દિલ્હી પોલીસના સ્પેશિયલ સેલે આંતરરાષ્ટ્રીય નકલી નોટોનો રેકેટનો પર્દાફાશ કરીને બે આરોપીઓની ધરપકડ કરી છે. પોલીસે તેમની પાસેથી 8 લાખ રૂપિયાની નકલી નોટો જપ્ત કરી છે. બંને આરોપીઓનું નામ ફિરોઝ શેખ અને મુફઝુલ શેખ છે. આ બંને આરોપીઓ પશ્ચિમ બંગાળના રહેવાસી છે. સ્પેશિયલ સેલના જણાવ્યા અનુસાર આ બંને બાંગ્લાદેશ બોર્ડરથી ભારતમાં નકલી નોટો સપ્લાય કરતા હતા.
સ્પેશિયલ સેલના ડીસીપી જસમીત સિંહના જણાવ્યા અનુસાર, છેલ્લા બે વર્ષમાં આ બંને આરોપીઓએ ભારતમાં લગભગ 2 કરોડની નકલી નોટો સપ્લાય કરી છે. પોલીસ અધિકારીઓના જણાવ્યા અનુસાર 2,000 રૂપિયાની નકલી નોટો એવી રીતે બનાવવામાં આવી રહી છે કે અસલી અને નકલી વચ્ચેનો તફાવત કરવો ખૂબ જ મુશ્કેલ છે.
સેલની ટીમને ઓક્ટોબરમાં માહિતી મળી હતી
સ્પેશિયલ સેલના ડીસીપી જસમીત સિંહે એક ન્યૂઝ એજન્સીને જણાવ્યું હતું કે ઓક્ટોબરમાં સેલની ટીમને બાંગ્લાદેશથી પશ્ચિમ બંગાળ સરહદે નકલી નોટો ભારતમાં સપ્લાય કરવામાં આવી રહી હોવાની માહિતી મળી હતી. સેલની ટીમે આ રેકેટ પર કામ કરવાનું શરૂ કર્યું. તપાસમાં ફિરોઝ શેખ અને મુફઝુલ શેખ નામના બે નામ બહાર આવ્યા હતા. પોલીસને જાણ થઈ હતી કે આ બંને જ નકલી નોટો સપ્લાય કરી રહ્યા છે.
સેલની ટીમે કાલકાજી વિસ્તારમાં છટકું ગોઠવ્યું હતું
પોલીસને એવી પણ માહિતી મળી હતી કે 21 ડિસેમ્બરે બંને દિલ્હીમાં નકલી નોટ સપ્લાય કરવા જઈ રહ્યા છે. આ માહિતીના આધારે સેલની ટીમે કાલકાજી વિસ્તારમાં છટકું ગોઠવ્યું અને જ્યારે બંને નકલી નોટો સાથે પહોંચ્યા, ત્યારે બંનેની ધરપકડ કરવામાં આવી. જ્યારે તેમની તલાશી લેવામાં આવી ત્યારે તેમની પાસેથી 8 લાખ રૂપિયાની નકલી નોટો મળી આવી હતી.
દેશના ઘણા વિસ્તારોમાં નકલી નોટો સપ્લાય કરવામાં આવી છે
આ પછી પોલીસે બંનેની પૂછપરછ શરૂ કરી. આરોપી ફિરોઝે પૂછપરછ દરમિયાન જણાવ્યું કે તેણે મુર્શિદાબાદના રહેવાસી સલામ નામના વ્યક્તિ પાસેથી 8 લાખની નકલી નોટો લીધી હતી અને આ નોટો દિલ્હીમાં સપ્લાય કરવાની હતી. પોલીસના જણાવ્યા અનુસાર, છેલ્લા પાંચ વર્ષમાં આ બંને આરોપીઓએ દેશના અલગ-અલગ વિસ્તારોમાં નકલી નોટો સપ્લાય કરી છે. તપાસમાં એવું પણ સામે આવ્યું છે કે 30 હજાર રૂપિયામાં એક લાખની નકલી નોટો ખરીદવામાં આવી હતી. પછી 40 થી 45 હજાર રૂપિયામાં વેચતા હતા. પૂછપરછમાં એવું પણ બહાર આવ્યું છે કે છેલ્લા બે વર્ષમાં 2 કરોડની નકલી નોટો દિલ્હી સહિત વિવિધ રાજ્યોમાં સપ્લાય કરવામાં આવી છે.
નકલી નોટો બાંગ્લાદેશથી ભારતમાં સપ્લાય કરવામાં આવતી હતી
સ્પેશિયલ સેલના જણાવ્યા અનુસાર, વર્ષ 2016માં જ્યારે દેશમાં નોટબંધી થઈ ત્યારે બાંગ્લાદેશ અને પાકિસ્તાનમાંથી નકલી નોટોનો સપ્લાય એક વર્ષ માટે સંપૂર્ણપણે બંધ થઈ ગયો હતો, પરંતુ હવે છેલ્લા 4 વર્ષથી નકલી ચલણની સિન્ડિકેટ ફરી સક્રિય થઈ છે. અને નકલી નોટોનો સપ્લાય શરૂ કરી દીધો છે. તપાસમાં સામે આવ્યું છે કે નકલી નોટોની આ ખેપ પાકિસ્તાનથી નેપાળ, નેપાળથી બાંગ્લાદેશ અને બાંગ્લાદેશથી ભારતમાં સપ્લાય કરવામાં આવી રહ્યા છે.
